قصيدة ما نسيته

توي دريت انه فراق وبكيته
أخوي ابن عمي ذرى العز والجود

نصف السنه مرت وانا مارثيته
كنه مودعنا نهارين ويعود

ما غاب عن عيني وانا ما لقيته
مثل المطر والنور والسحب والنود

فهد تتعب سيرته لا حكيته
أنا اشهد انه حط رجال فالعود

انساه لا والله انا ما نسيته
الطير ما ينسى جناحين وعضود

يا كثر ما فالقلب له ما حكيته
بعض الغلا ما له نهايات وحدود

باحساس وشعور المحبه قريته
كتاب طيب يرفع الراس ويزود

يا عمي اللي داخلك لو كنيته
تشوفه قلوبٍ بها فهد موجود

تسابق دموع الغلا لا طريته
اخوي لو سمي فهد قوم وفهود

يا عمي الخفاق بيتك وبيته
تبقى لنا ياللي لك المجد ممدود

وما مات من خلد مع الناس صيته
والموت حق وكلنا يمه ورود